Que yá nun podemos tar
oyendo la mesma agua
del rullar de cada día:
vásenos ensín palabra,

tuya y mía, cada instante
como páxaru qu’esnala
ensín un cantar d’azul
nomeolvides, ensín nada

que seya un netu gociar
los sabores de mazana…
Que l’amor de l’alta nueche
tien la más dulce alborada.

Que yá nun podemos tar,
yá que puede la distancia
más que los suaños de dos
suañando la mesma agua.

Pie:
Yes pa mios oyos, tan tuyos,
amante, llume llonxana:
fueu de besar perselino
y señardá que me llama.

LLAN DE CUBEL